巴西弗爆 坐底贏奧地利兩粒

猪拉多纳

同晚另一場熱身賽同屬南美同歐洲波對決，由巴西作客鬥奧地利。巴西自鄧加回巢後5場國際賽全勝兼保持不失波，球員信心、狀態已從世盃慘敗中恢復過來。奧地利近期成績雖有進步，但佢哋啱啱喺歐國盃外圍賽激戰俄羅斯，球員回氣需時，想打破鄧加完美紀錄並唔容易，信巴西可乘勇再炒一場，捧讓球客勝。

（TVB 302周三凌晨2時直播）

如果要用一句說話去形容鄧加回歸後巴西隊嘅表現，波童會用「循序漸進」。針對球隊喺世盃接連被德國、荷蘭蹂躪，防守出身嘅鄧加上任後首要任務就係挽回球員信心及加強防守意識，所以頭兩仗對哥倫比亞及厄瓜多爾唔算贏得清脆，但嚟到近兩仗面對實力較弱嘅日本同土耳其，巴西終於踢回水銀瀉地嘅進攻足球，近兩仗入6球嘅尼馬狀態有幾弗唔在講，車路士孖寶奧斯卡杜斯山度士及韋利安亦交到功課，連帶陣中部分國際賽經驗較淺嘅國腳，包括上場對土耳其踢足全場嘅薩克達箭頭雷斯阿祖安奴、後備上陣嘅球會隊友杜格拉斯哥斯達或波圖中場卡斯米路都冇怯場，暫時嚟睇呢支巴西新軍相當對辦。
砌完俄羅斯要回氣

當然世上並冇長勝之師，鄧加帶領嘅巴西終有輸波嘅一日，但今次對住奧地利應該未係時候。奧地利現時喺歐國盃外圍賽G組高踞榜首，佢哋3日前才於主場擊敗出線勁敵俄羅斯，難免要回一回氣，假如領隊馬素高拿搵副選落場，逐個秤實力又難同巴西相比，預期巴西可保持強勢，贏兩粒係基本消費。