英軍穩操勝利票

猪拉多纳

派邊緣國腳教訓蘇格蘭

今晚熱身賽爆發大不列顛內訌，一向以大佬自居嘅英格蘭作客火併蘇格蘭。雖然「三獅兵團」主帥鶴臣講到明會畀一眾邊緣國腳表演機會，但早前蘇格蘭搞公投令敵對情緒進一步升級，英軍梗係想喺球場上贏得清脆利落，況且「韋大帝」韋碧克着晒火絕對唔赦蘇格蘭，客勝不容錯過。

（now 621周三凌晨4時直播）

儘管呢類熱身賽無關痛癢，不過英、蘇嘅世仇關係就唔係咁講，九月蘇格蘭曾發動公投要求脫離英國獨立，最終統派僅以55.8%得票率險勝避免分裂，但某程度上令英格蘭冇晒「飛士」。政治同體育從來都分唔開，英格蘭啱啱幾乎畀蘇格蘭剃眼眉，今晚喺球場上正面交鋒，一向以大佬自居嘅「三獅兵團」，梗係想砌低呢位「親密敵人」啦！

英格蘭主帥鶴臣賽前表示今仗以考察邊緣國腳為主，其中首席門神赫特已獲准提早休息，因此賓科士打及費沙費士打將會爭逐正選把守大門，後者今夏先從些路迪南下投效「聖人」修咸頓打出超水準，若果今仗重返成名地些路迪公園球場被派上陣，如同獲「主場之利」，拍住另一「聖人」後衞尼達利基尼鎮守防線更添信心。
韋碧克腳風超順

上仗英格蘭反勝斯洛文尼亞，隊長朗尼迎來百戰兼入波成為焦點，但論到托弗就唔及嗰場省兩粒嘅韋碧克，呢位阿仙奴前鋒現時以五球，成為今屆歐國外射手榜其中一位排頭位前鋒，賽前佢話對呢場內訌急不及待，「韋大帝」腳風咁順隨時再顯神迹。查實蘇格蘭狀態唔曳，剛於歐國外戰勝愛爾蘭，不過賽後樂極生悲，有球迷喺球場樓梯碌落地重創致死，難免影響眾將士氣，加上本身質遜一籌，箭頭史提芬費查對愛爾蘭勇戰受傷退隊，賴史密夫為國効力常腳頭無靈，就算有地利都信唔過，斯維力撐「三獅兵團」。