西班牙生力軍撞散德國

猪拉多纳

今晚上演重量級熱身賽，由西班牙主場硬撼應屆世盃盟主德國。雖然「狂牛王朝」於今夏世盃表現欠佳而宣布落幕，但艾斯高等一班生牯仔成功接班；相反德國奪冠後不思進取，近年交手亦冇啖好食，連門神紐亞都因傷退隊，寧願捧番西班牙。

（周三凌晨3時45分開賽）

西班牙喺今夏世盃意外地於分組賽出局，老將沙維、沙比阿朗素及韋拿亦悉數退役，好彩該隊人才輩出，佐治高基、艾斯高、柏高艾卡沙等新人極具潛力，的確為「鬥牛國」注入活力及朝氣，其中艾斯高傳得扭得射得，甚有「小白」恩尼斯達影子。而且鋒霸迪亞高哥斯達及中場法比加斯疑詐傷冇入選，呢對車路士孖寶擅於打快速反擊，與西班牙一向嘅tiki taka踢法格格不入，今次冇咗佢哋反而令進攻組織更加流暢，賽前主帥迪保斯基仲加把口，話「迪哥」同法比仔下次重返國家隊時，可能已失去正選，變相激勵麾下一班生牯仔爭上位。
日耳曼兵團天殘地缺

德國卻從勇奪世盃嘅高峰急速下滑，包括歷史性首次輸畀波蘭，上仗對住畀愛爾蘭同波蘭狂數七蛋嘅魚腩直布羅陀，堂堂世界冠軍只贏得四粒，主帥勒夫對球員嘅比賽態度非常不滿。至於拿姆同高路斯嘅急流勇退，除右閘及前鋒位置後繼無人之外，冇咗呢兩位老將及長期養傷嘅隊長舒韋恩史迪加，令「日耳曼兵團」失去精神領袖，連埋代隊長兼門將紐亞及中堅謝路美保定因傷退隊，防線更加危危乎，加上近六次出戰西班牙贏得一次咁大把，擺明畀對手食住，「鬥牛國」主勝捧得過，順便賀一賀隊長卡斯拿斯啱啱成為歐國盃史上贏波最多（32場）嘅球員。