過期葡萄唔開胃 阿根廷美斯發圍

猪拉多纳

C朗回歸奧脫福笑唔出

英國曼徹斯特今晚上演新世紀球王決戰，阿根廷對葡萄牙等於美斯鬥C朗，但焦點當然係C朗重返奧脫福球場比賽。雖然計近況C朗弗過美斯，不過葡萄牙嘅主力陣容，其實冇幾多個有戰鬥力，相反似足過期葡萄睇落都唔開胃，今場博阿根廷開W好過。

（TVB301周三凌晨3:45直播）

阿根廷上星期喺熱身賽2:1反勝克羅地亞，美斯踢足全場，除咗射入12碼奠勝，仲有助攻兼射中柱，證明佢踢熱身賽都冇揸流攤。無疑美斯今季嘅狀態的確唔及C朗，就連阿根廷球王馬納當拿都話，佢兩個其實已經同級，為咗保住世界最佳球員稱號，美斯當然想造番起個勢，否則可能真係要諗定後路，準備被巴塞掟走。
C朗︰熱身賽冇實際價值

另一方面，C朗喺皇家馬德里瘋狂爆發後，日前喺葡萄牙對阿美尼亞嘅比賽尾段射入致勝球，的確弗到難以置信。不過咁，賽前C朗已講明，今場不過係普通熱身賽，並唔係世盃賽事，冇咩實際價值，暗示佢對呢場牙骹戰冇特別感覺，就算佢重返成名地奧脫福比賽，都未必會出盡120%力量，戰意可能較輸蝕。
葡萄牙過氣球星孭飛

更令人擔心嘅係，葡萄牙贏阿美尼亞嗰場波入面，正選陣容嘅前鋒普斯迪加、中場堤亞高文迪斯、翼鋒丹尼艾維斯、中堅卡維奴同右閘保辛華，全部年過30兼過晒氣，當中普斯迪加轉會拉科魯尼亞後得1個入波，保辛華更加係事隔4年後獲得重召，半隊正選咁嘅貨式，絕對令人唔開胃。既然阿根廷陣容正路得多，要開1.78倍W應該唔難嘅。
盤路解碼

葡萄牙近7場「讓球主客和」未開過「讓球勝」，4次開「讓球和」。
Data King：C朗膺歐國盃士哥王

‧兩隊過去7次熱身賽交手，阿根廷得5勝1和1負。

‧阿根廷新領隊馬天奴上任後得3勝1負。

‧葡萄牙連續6場開半場細。

‧葡軍隊長C朗剛成為歐國盃外圍賽及決賽周史上入波最多球員，共23球。
乜都玩錦囊：葡萄牙半場6連細抵追

雖然阿根廷同葡萄牙，分別有美斯同C朗孭飛，不過阿根廷新教頭馬天奴嘅戰術唔算好進取，葡萄牙又得C朗識入波，假如大家怕阿根廷開唔到W，就不妨試吓玩半場入球細，畢竟葡萄牙已經連續6場開半場細，慣性慢熱上半場未必有波入。