大象雄獅開入球騷

猪拉多纳

非國盃外圍賽D組今晚做「大」騷，科特迪瓦喺主場迎戰喀麥隆，梗係玩入球大最好。自從科特迪瓦踢完世盃搵新教練連拿特執教，佢哋就玩喪攻足球連續5場非國外開入球大，加上對家喀麥隆已經肯定首名出線，冇包袱可以鬥攻踢好波，1.9倍入球大咪走雞！

（開賽時間：周三晚10:00）

科特迪瓦喺世盃分組賽出局後，就搵咗嚟自法國嘅連拿特領軍，呢位教頭帶過贊比亞同安哥拉，好熟悉非洲足球。佢做咗「大象兵」教頭後，領軍6戰場場有士哥之餘亦例必失波，合共攻入14球同時失咗12球，只得熱身賽1:1和贊比亞嗰場係開細，其餘5場非國外全部開大，擺到明有前冇後打死罷就！
喀麥隆踢風流波

雖然「大象」領袖杜奧巴已經退出國家隊，但上場停賽嘅前鋒韋費特邦尼刑滿今戰可以候命，點都係好消息。佢哋早幾日作客以5:1大勝塞拉里昂，幾件主力包括謝雲奴、沙洛文卡勞同耶耶托尼都有波入，今戰喺主場搶到分就夠次名出線，火力同戰意都唔需要擔心。

客軍「不屈雄獅」喀麥隆家陣「咧」住「大象兵」4分，今場就算輸波都肯定首名，未必會搏盡。喺兩大射手伊度奧、韋保退役後，前鋒阿布巴卡同祖奧莫亭肩負起入波重任，首循環喺主場就係靠阿布巴卡梅開二度贏科特迪瓦4:1，今場風流波省番一兩粒唔好吞蛋就夠交差，要同「大象兵」夾計開大唔係難事囉！