小保加河床博半和

猪拉多纳

死敵4強碰頭唔想失頭威

聽朝有場南美球會盃重頭戲，4強首回合上演阿根廷國家打吡，小保加主場硬撼河床，呢場波事關重大，預料雙方都唔敢輕舉妄動，會以穩陣行先，阿King推介1.85倍嘅半場和。

（周五早上7時45分開賽）

踢咗咁耐終於都嚟到南球盃4強階段，仲要係對住傳統死敵，小保加同河床無論係為面子定係為爭入決賽，都唔想失頭威。雖然河床今季個勢比較勁，喺阿甲排榜首位置，小保加只係排喺第5位，但小保加近排走勢唔錯，近八場只係輸咗一場，河床作客想咬得入小保加唔係咁易。況且次回合返去河床主場，河床今場只要唔輸，留到次回合再全力搏殺都唔遲，預計佢哋今場會踢得穩陣甚至唔介意死守，先保住不敗。最後睇埋兩軍對賽成績，小保加近五次喺主場對住河床，有四場係開出半場和，今場一於追半場和喇﹗
史提芬納治讓唔起業餘仔

另外今日有場英足盃首圈重賽賽事，由非聯賽球隊梅德士東聯喺主場對乙組嘅史提芬納治，史提芬納治上次喺主場都贏唔到梅德士東聯，以佢哋今季八次作客僅一勝嘅成績，今場難言穩勝，受讓嘅梅德士東聯值捧。最後講埋阿甲獨腳戲，防衞者主場迎戰紐維爾舊生，紐維爾舊生近八次作客僅一敗，受讓值捧。