PSG殘陣冇優「細」

猪拉多纳

伊巴謙又傷 梅斯主場唔曳

國際賽檔期過後，唔少大球會都感染FIFA病毒，就連法甲豪門巴黎聖日耳門（PSG）都走唔甩。佢哋個王牌前鋒伊巴謙莫域傷愈復出為國上陣，結果再度受傷，加上其餘3件主力仲未好番，今晚作客主場威力唔差嘅梅斯，睇怕都幾難炒起對手，諗落都係1.82倍入球細抵玩。

（TVB302周六凌晨3:30直播）

伊巴謙莫域之前已經因傷缺陣超過1個月，佢剛周日喺瑞典歐國盃外圍賽G組作客黑山場波復出，而且仲有「士哥」幫國家隊搶番1分。雖然狀態睇落唔錯，不過PSG好快就笑唔出，事關呢位瑞典射手賽後又宣布受傷，連啱啱周三對法國場熱身賽都踢唔到，今晚睇怕都唔使預佢落場。
疲兵卡雲尼靠唔住

更大鑊嘅係PSG中場馬度迪、馬高華拉堤、盧卡斯洛迪古斯全部打柴，計落呢4位主力今季夾埋入咗13球，佔咗聖日耳門總入球約4成，話對火力冇影響就勢係假。雖然佢哋仲有近6場入5粒嘅射手卡雲尼孭飛，不過呢位烏拉圭國腳前日先喺智利首都聖地亞哥踢完波，跟手就要越洋飛返法國，就算趕得切歸隊都未必回得切氣，難怪連主帥白蘭斯都承認今次備戰時間不足，相信要佢哋入多球都難。
梅斯地頭未輸過

論名氣同人腳，梅斯的確同PSG冇得揮，但呢班波勝在主場夠惡，至今仍保持不敗，就連里昂嚟到都要擺低3分先走得。可惜嘅係呢隊波鋒力唔夠穩定，近6戰有4場食白果，冇乜爆冷贏波本錢，不過若然一心擺鐵桶死守嘅話，PSG都唔係咁易就咬得入。