南陽望族忠心肯纏

不死鸟

繼續係黃汝安，K359「南陽望族」為最新一匹練馬師團體馬，與上兩匹「精算拍檔」、「颯若風」一樣來自新西蘭，響當地共上陣7次，贏3場1200米，1400米兩戰得一亞，1600米亦跑過一次，該場為三級賽，負3乘得第六也有獎金，睇過好幾場出賽片，跑法模式差唔多，先前打疊贏馬都係跟前守好位，入直路加速揮贏對手，奮鬥心極強之馬也。最驚喜的是來港前一場80分讓磅賽，大熱贏馬唔意外，但第一次跑軟地，排1檔唔夠快侷住留後，之後兜大彎，再使出前所未見?後勁，跑法突變下照贏如儀，即是話匹馬仲有進步空間。
「南陽望族」血系唔算名門望族，老豆係「最後大亨」個仔Towkay，媽媽源自Centaine，兩線都相當適合本港發展，縱然來港前只贏1200米，但半兄弟曾勝1600、1800米，母系第二代成員唔少亦贏到2000米以上，相信中距離路程可應付裕餘，在紐贏到80分讓磅賽，來港評78分當不會吃緊，反而跑慣左轉，重新調教或要花一點時間。