紅軍「客」窒水晶宮

猪拉多纳

3連敗急止血 遇弱搶W博反彈

利物浦今個月連輸3場，近日又收到巴洛迪利同佐敦軒達臣受傷、史杜列治一傷再傷嘅連串壞消息，今晚英超作客水晶宮，好自然畀人睇淡，不過以前學校都有教過我哋一句成語，叫「否極泰來」，當衰運行到盡頭時，好運就會嚟，而且一班紅軍球員亦會「知恥近乎勇」，佢哋今場對住近5場輸咗4場嘅水晶宮，就係反彈好時機，客勝值得一博！

（now 621周日晚9時30分直播）
羅帥為保烏紗而戰

連續輸畀紐卡素、皇馬同車路士後，利物浦好彩有個國際賽期以作緩衝，等領隊羅渣士有更多時間諗吓，點樣可以扭轉球隊劣勢。依家羅帥備受壓力，面臨領軍以嚟最大嘅危機，外面更有傳球會老細有意搵賓尼迪斯返嚟頂替佢，如果今場連水晶宮都贏唔到，睇怕羅帥好快會烏紗不保，相信一班羅帥子弟兵如菲臘比古天奴、史達寧、佐敦軒達臣等都唔想出現呢個結果，今場實會為羅帥拚死一戰﹗

雖然國際賽期後紅軍多咗「巴神」同「軒神」兩位傷兵，不過軒達臣傷勢應該冇乜大礙，今場可以紮住上，至於「巴神」機會就真係微啲，但咁可能對球隊嚟講係一件好事，其實之前見到紅軍無論出列基林拔定波連尼，效果都好過搵「巴神」打單箭頭多多聲，至少前兩者肯走肯同其他隊友配合，唔似得「巴神」咁獨食，一班中場反而有更多位搵食。
上季曾壞奪冠好事

仲記得上季季尾水晶宮主場對住利物浦，喺落後3球嘅情況成功逼和紅軍3比3，令紅軍奪標夢正式破滅，而蘇亞雷斯賽後忍唔住爆喊出嚟，睇到利迷個心「實」晒，今場仲唔有仇報仇？

不過，今季嘅水晶宮唔再係上季嗰支難踢到暈嘅球隊，領隊亦由佩尼斯改為禾諾克，隊波喺禾帥領軍下進攻有改善，但防守就冇咁硬淨，近5場有4場都要失兩球以上，咁嘅防線難頂既要翻身又要報仇嘅紅軍，一於直取利物浦客勝啦！