漢堡潛力遠勝不來梅

猪拉多纳

今晚德甲打吡日，除咗舜文分析嘅史特加對奧格斯堡呢場南部巴登符騰堡州打吡外，早場仲有更矚目嘅漢堡主場對雲達不來梅，上演第101次北部打吡，兩軍牙齒痕深，兩軍目前分別排喺尾二同尾三，為護級亦要打甩髀，黑柴相信漢堡可以憑質喺主場贏波，主隊讓到半一盤口堅挺，捧上盤。

（有線61及64台周日晚10時30分直播）

漢堡同不來梅球迷向來互相仇視對手，記得漢堡上季尾戰績差換帥，曾經邀請過前不來梅主帥舒哈夫過檔，當時舒哈夫已經賦閒在家大半季，好恨出山執教，但係佢自細就為不來梅効力，點都唔想不來梅球迷唔高興，一聽到搵佢教嘅係漢堡，就立即拒絕，寧願等到今季至出山教窮鬼球隊法蘭克福。結果漢堡搵咗史隆卡執教，雖然僥倖護級成績，表現同成績始終令人失望。到咗今季呢兩支北部傳統勁旅同病相憐，季初齊齊脫腳，結果又雙雙炒咗教練，漢堡嘅史隆卡同不來梅嘅杜特都冇得留低。

漢堡同不來梅開咧冇耐就換帥，咁啱又分別起用球會青年軍教練接手，漢堡嘅辛巴亞同不來梅嘅史基普尼克雖然都冇執教甲組隊經驗，但佢哋今季較早前已經喺U23聯賽交過手，結果辛巴亞帶領嘅漢堡青年隊，贏咗史基普尼克嘅不來梅四比二。
不來梅射手迪山度缺陣

講到北部打吡，不來梅近年好醒神，近六次交手贏咗五次，球隊喺史基普尼克執教下喺德國盃同德甲亦錄得三連勝，不過今仗賽前傳來噩耗，前線相當倚賴嘅首席射手迪山度右膝受傷無緣披甲，攻力嚴重受損，而且佢哋人腳實力始終較弱，相反漢堡季前擴軍後質素遠勝對手，經過兩周國際賽休整期有助球隊進一步磨合，黑柴堅信呢班兵有潛力殺上聯賽榜中上游，今晚主場出擊讓得起注定要護級嘅不來梅。