銀河海灣者鬥入波

猪拉多纳

美職西岸決賽首回合

NBA開季冇耐，不過美職季後賽已經踢到白熱化階段，東西岸決賽正式開打，重頭戲當然係洛杉磯銀河主場硬撼西雅圖海灣者嘅西岸決賽啦！兩隊係常規賽入面係成績最好、火力最強嘅球隊，銀河有星級射手當路雲同羅比堅尼孭飛，作客嘅海灣者就有「黑白雙煞」丹普西同馬田斯攻堅，聽朝呢場大戰唔使諗咁多，捧1.75倍入球大啱數。

（TVB302周一早上6:00直播）
當路雲 馬田斯勁Fit

銀河喺西岸4強次回合一戰，主場大炒皇家鹽湖城5蛋，季尾就會掛靴嘅當路雲大爆發，個人連中三元，呢位前美國隊長講明想做單大嘢，為職業生涯畫上一個完美句號，今鋪主場出擊實會全力爭取「士哥」。季後賽採取主客兩回合制，今場唔攻爆你唔通等作客咩？為免夜長夢多，可以預期銀河聽朝唔會踢得保守。

你有當路雲同羅比堅尼，海灣者亦有丹普西同馬田斯攻堅，佢兩個都喺歐洲球壇威過吓，丹普西有技術兼把握力強，喺常規賽入咗15球；馬田斯就有速度，嚟到級數較低嘅美職，只要交出正常水準都已經夠玩，佢嘅常規賽入球仲畀丹普西多兩球。海灣者有佢兩個在陣，使乜驚冇作客入球？入波唔慌少啦！