西維爾插翼難飛 維拉利爾遜得過

猪拉多纳

歐霸盃分組賽，西甲雙雄西維爾、維拉利爾分途出擊！G組上屆冠軍西維爾作客飛燕諾，前景難樂觀，佢哋近況麻麻，剛於聯賽慘敗於巴塞腳下，歐霸搶分壓力亦唔大，小心又失拖。飛燕諾近5仗不失波，主場更6連勝，受讓抵玩。

（有線63台周五凌晨2時直播）

西維爾今季曾經帶來驚喜，一度高居西甲次席，但近期有所回氣，連續3場失分，輸畀巴塞都算，但連畢爾包、利雲特之流都贏唔到，令人失望。由於西維爾人腳唔算充裕，衝完一段之後，演出回落，亦唔出奇，不妨趁機捧佢哋對家。

飛燕諾依家當旺，連盃賽在內，近10場贏8場，主場更6連勝。呢支荷甲勁旅現時僅領先小組3、4位標準列治及列積卡兩分，出線位置唔穩，今仗搶分決心比西維爾高。飛燕諾受讓平半，下盤固然可取，甚至可以博埋主勝。
慕遜加柏一沉百踩

A組維拉利爾主場對慕遜加柏，雖然「黃色潛艇」唔係叻，但慕遜加柏更不濟，佢哋早前被多蒙特打破今季不敗之身後，明顯洩咗道氣，上仗輸埋畀態沉嘅法蘭克福，令人擔心佢哋會一蹶不振，要維拉利爾主勝為妙。

（有線64及203台周五凌晨4時05分）