紅魔遇弱最穩陣 列強出擊小心中伏

猪拉多纳

本周英超戲碼唔算強，大部分出名嘅球隊都只係對住中下游隊伍，喺咁多場賽事裏面，筆者認為最難爆冷嘅應該係曼聯主場對侯城。紅魔現時雖然仍有多名主將受傷缺陣，但前線朗尼同門將迪基亞最近比賽都交出好表現，今晚對住只係排17嘅弱旅侯城，3分落袋機會可以話係高唱入雲。
羅渣士聞到「魷魚香」

至於其他列強賽事就各有暗湧喇，近況愈踢愈沉嘅「紅軍」利物浦會喺主場對史篤城，佢哋周中歐聯作客對住盧多格德斯都贏唔到，瀕臨出局邊緣，主帥羅渣士真係開始聞到「魷魚香」，今仗對住史篤城若然有咩差池，帥位分分鐘有排驚。利物浦而家只有14分，比史篤城少1分排第12位，若然今場贏波相信羅帥可以稍為「吊吓鹽水」。

而榜首球隊車路士就會去到東北惡鬥「黑貓」新特蘭，車路士開季順風順水，但新特蘭主場向來表現硬淨，今季聯賽主場只係輸過畀阿仙奴一隊，睇吓「車仔」主帥莫連奴能否帶領球隊延續威勢，進一步拋離群雄。

至於近期有表現反覆，喺歐聯已經晉級嘅阿仙奴，作客西布朗當然希望全取3分，但阿仙奴究竟讓唔讓得起西布朗半一呢？筆者就覺得「兵工廠」近期唔太穩陣，以賠率嚟睇今場唔算值搏。
金句：最冇大賽的一周，就係最易爆冷的一周