畢爾包腳軟 焗踢守細波

猪拉多纳

今晚西甲將會上演「中游悶戰」，由第10位嘅基達菲主場迎戰第9位嘅畢爾包。基達菲一向限米煮限飯，話好又講唔上，話差又唔算係，近況同戰績都普普通通。畢爾包自歐聯出線機會渺茫後，將會重新專注聯賽，防守表現愈趨穩健，相信今場作客會以守行先，有利開出入球細。

（開賽時間：周六晚上11:00）

基達菲近4場1勝1和2負，上輪作客另一支中游隊伍維拉利爾，全場受制於對手之下，上半場落後兩粒，最後由拿辛破蛋以1:2敗走。之不過佢哋主場演出相當硬淨，之前硬撼衞冕球隊馬德里體育會只係僅輸0:1，防守值得信賴，而且佢哋火力異常疲弱，踢咗12輪入得9球，係西甲入波最少第二位，絕對係細盤客嘅恩物。
基達菲12場入得9球

雖然講兩軍近況嘅話，畢爾包會係較好嗰隊，近4場聯賽錄得3勝1和，加埋失咗1球咁大把，可見佢哋防守相對季初改善咗唔少，弊在呢支巴斯克大軍嘅鋒力其實都唔好得去邊，入波僅僅多過基達菲1球。即使佢哋喺周中歐聯爆咗個小冷門，以1:0擊敗攻擊力強橫嘅薩克達，對士氣帶嚟正面幫助，不過今晚連續第2場作客出戰，相信採取主動嘅機會唔高，預期今場都係悶戰居多，入波點會多先？