浦和作客鳥棲開「大」餐

猪拉多纳

衝擊鬼門關 冇得揸流攤

日職今日展開倒數第二輪賽事，「一哥」浦和紅鑽作客「四哥」鳥棲砂岩，呢場波對浦和嚟講等同衝擊鬼門關，輸親就前功盡廢，對手鳥棲贏到就仲有權爭標，大家焗住搏拳，1.9倍入球大博得過。

（有線61、148、201周六下午1:00直播）

睇番個榜首形勢，浦和只咧住大阪飛腳兩分，冇乜絕對優勢，甚至乎排第3、4位嘅鹿島鹿角、鳥棲砂岩如果能夠兩連勝埋尾，一樣可能攞到冠軍。正因為咁，浦和賽前備戰氣氛緊張，埼玉縣嘅媒體仲用「鬼門突破」形容浦和今場波嘅處境，查實佢哋並冇誇大，浦和舊年對鳥棲兩戰全敗，近3次客戰去到佐賀縣亦輸晒，畀鳥棲食到應一應，舊年浦和臨尾香同錦標擦身而過，公認係同作客1:4慘敗畀鳥棲有關。

今次仇人見面，其實浦和全隊上下都超緊張，除咗落雨一樣練波，仲搵咗身高1米81嘅阪野豐史扮鳥棲前鋒豐田陽平，等班後衞日日狂操點樣抵禦高中鋒。咁又難怪浦和咁怕呢個1米85鋒將嘅，事關過去3年幾次對碰，有「日本杜奧巴」外號嘅豐田陽平，總共7次省爆咗佢哋嘅大門，得1米77嘅森脇良太畀佢撞到一戙都冇，搞到佢今次要苦練點樣搶佔皮球落點嚟抗敵。

由於鳥棲贏到浦和就有望後來居上，染指日職冠軍，佢哋亦都苦練兩翼側擊同長傳急攻，準備工夫居然同浦和不謀而合，即係話雙方好大機會搏拳互揪，睇番雙方近6次交手開咗5次大，平均每場入成4.6球，冇理由唔博大啫。