巴塞半場送大禮

猪拉多纳

創會115周年 同華倫演好戲

巴塞隆拿做大騷賀「牛一」！昨日係巴塞成立115周年，球隊上下一片喜氣洋洋，連番慶祝，繼出席贊助商送車活動收大禮後，又拉隊去玩小型賽車，來到今晚戲肉西甲作客華倫西亞，當然要踢好波贈興，美斯弗爆，蘇亞雷斯已開齋，火力全開數胡。華倫今季主場戰績彪炳，唔怕同對手駁火，雙雄硬碰應會迅速入局，2.02倍半場大，可望提早收錢。

（now 632周一凌晨4時直播）
美斯「瘋Goal」爭金球獎

美斯近期腳風大順，連續兩仗帽子戲法，先後打破西甲及歐聯入球紀錄，搶晒C朗風頭，出行力爭國際足協金球獎。另外巴塞球迷最期待畫面終於出現，就係蘇亞雷斯上仗歐聯取得加盟後首個入球，相信入波陸續有來。球隊一片歡欣，上周五晚去玩小型賽車鬆一鬆，估唔到中堅碧基首先衝過終點，馬田蒙度亞同養緊傷嘅華美倫緊隨其後。反而美斯、尼馬輸幾條街，似乎想球場上先搏殺。

另外，尼馬獲《福布斯》選為巴西最具影響力人物，難怪懶理舊愛般娜有戀情，專心踢波做「事業男」。適逢巴塞成立115周年，送畀會方最好禮物當然係贏波，眾將士肯定額外落力，相信一開波就會搶攻。

華倫西亞亦非善男信女，今季主場6戰5勝1和，包括3比1擊敗上季冠軍馬體會，4個入球都係上半場出現，可見勁旅過招先下手為強。華倫同巴塞上季交鋒各贏1次3比2，近5次對賽4次開半場大，值得再追。