熱刺 愛華頓疲兵捱細界

猪拉多纳

周中踢完歐霸冇力搏錘

英超今晚又有好戲碼，熱刺喺主場惡鬥愛華頓，扒逆水玩1.9倍入球細。事關兩隊剛啱踢完歐霸盃，同樣傷兵滿營，加上熱刺前線只係得件新丁哈利卡尼有料到，兩軍都冇乜火，要開入球騷唔容易囉！

（now621台周一凌晨0:00直播）

熱刺近期走勢明顯有好轉，周中喺歐霸盃主場以1:0砌低柏迪遜後，近6戰有5勝1負，領隊普捷天奴終於可以鬆番口氣。
熱刺齋靠卡尼 愛華頓玩單箭頭

之不過咁，其實熱刺鋒線幾乎靠晒新星哈利卡尼孭飛，無論係上場擔正嘅蘇爾達杜，抑或係傷愈可以候命嘅艾迪巴約，都絕對可以用「佗衰家」嚟形容佢哋，根本完全靠唔住。

對家愛華頓走勢比熱刺仲要再勁啲，周中喺歐霸盃作客以2:0打沉禾夫斯堡後，近8戰錄5勝3和佳績，中鋒盧卡古同中場奧士文更加輪流入波添。不過大家要留意一點，就係愛華頓嘅傷兵情況比熱刺更加嚴重，盧卡古同伊度奧喺歐霸盃合作打正選後，今晚好大機會轉番單箭頭陣式，先求穩守再謀後動，唔易開大騷。

當然，大家都知，熱刺同愛華頓入球能力都唔算話太曳，但足智彩今場個入球大竟然有1.8倍，比起其他英超賽事賠率係偏冷咗少少，話晒兩強對碰高手過招，真係未必會同你駁火對攻，博入球細隨時有驚喜。
（日）26 熱刺 Vs 愛華頓