狼堡慕遜奇兵「大」激鬥

猪拉多纳

（日）22 禾夫斯堡 Vs 慕遜加柏

德甲除咗拜仁大超班，其餘各隊實力都好平均，禾夫斯堡同慕遜加柏季初就成功突圍，目前分別排喺聯賽榜第2同第3位，今晚呢兩支奇兵正面交鋒，肯定好睇過戲！主隊禾夫斯堡火力超勁，「中堅賓」賓特拿最近仲大踢爭氣波，對住擅長反擊嘅慕遜加柏肯定拳拳到肉，1.57倍「入球大」冇走雞！

（有線61、64、201及203周日晚10:30直播）
禾夫斯堡鋒力僅次拜仁

禾夫斯堡今季引入丹麥前鋒賓特拿，連球會高層都承認係「退而求其次」嘅選擇，勢估唔到呢位論論盡盡嘅前鋒最近愈踢愈好，佢同克羅地亞老將奧歷輪流發威，目前禾夫斯堡喺聯賽入24球，鋒力僅次拜仁，令人大跌眼鏡！講近況，「狼堡」近5場聯賽亦每仗至少入2球，今鋪回師主場出擊，相信可以Keep住呢股「士哥潮」嘅。

慕遜喺德甲連輸兩場跌落第3，基拉馬喺對多蒙特嗰球驚天烏龍波，或多或少打擊咗慕遜球員嘅信心，好彩，呢班波始終有一定質素，安達夏恩、靴爾文同麥斯古斯嘅攻擊組合畀到人信心，呢3位仁兄包辦隊波近7成聯賽入球，今晚造訪「狼堡」可以大踢穩守突擊，大把入球「餐士」。
頂占筍盤：禾夫斯堡（入球大）