羅馬迎國米大陣仗

猪拉多纳

攻擊四重奏煞食 升呢意甲「快槍手」

今晚意甲爆發重量級好戲，羅馬會喺主場硬撼國際米蘭。「雌狼」今季勁多炮台，兩大發電機比真歷同拿積率領嘅「攻擊四重奏」，更領軍「升呢」做意甲「快槍手」，奈何條防線實在太多十字軍，對住同樣入得又失得嘅國米，1.95倍大冇理由唔撐吖。

（TVB301及廣東體育周一凌晨3:45直播）

「二哥」羅馬新季12戰獲9勝1和2負，成績咁好皆因處處都係炮台，至今已經有11名球員入過波，「士哥」人數冠絕意甲。最得人驚係呢支首都球隊鍾意殺對手一個措手不及，今季聯賽上半場已經累積攻入15球，呢個數字亦係意甲之首。寶刀未老嘅托迪固然係猛料，但查實比真歷同拿積先至係成隊波嘅靈魂！
「雌狼」上半場勁入15球

比真歷創意十足，畀波夠晒獨到，至於重生嘅拿積今季已經攻入4個意甲「士哥」，有佢兩個同托迪、謝雲奴合組「攻擊四重奏」，對住今季頭15分鐘時段已經累積失咗5球嘅國米，話唔埋又可以閃電開紀錄。不過羅馬有樣隱憂，就係傷兵一大籮，計落就有巴沙列堤、托路斯迪斯、李安度卡斯坦同恩加麥比華等防線要員養緊傷，教頭魯迪加西亞焗住用回晒塘嘅馬爾干擔正，後防都咪話唔危。

客軍國米最近由文仙尼重掌帥印，呢位型佬領軍兩場分別錄得1勝1和，睇落好似好醒，但留意番「米蘭打吡」同上周中歐霸盃鬥迪尼普場波，國米都係先落後嗰隊，一對中堅祖安古靴美同蘭奴捷亞，一直畀意媒批評冇默契兼冇態，睇怕呢個問題都令文仙尼幾頭痛。
「藍黑兵」莫路伊卡迪當弗

不過咁，文仙尼領軍兩戰都後上搶到分，證明佢哋後勁唔講得笑，畢竟新帥上任，班球員梗要加多兩錢肉緊爭表現，單睇獲解凍嘅古斯曼奴域都喺上周中場波踢到曉飛就知咩料。羅馬有「攻擊四重奏」，國米亦有「南美三叉戟」，靴蘭尼斯、莫路伊卡迪同柏拉斯奧腳法、速度兼備，當中莫路伊卡迪今季已經有7球進帳，加埋傷愈嘅奧斯華度有望後備上陣倒戈，今場鬥攻入波唔慌少啦！
盤路解碼

羅馬今季意甲5場開大，7場開細。