森多主場攻得狠 大盤有揸拿

猪拉多纳

今周意甲壓軸戰由森多利亞主場鬥拿玻里，呢場波可謂歐聯入場券前哨戰，森多利亞異軍突起，今季主場仍然保持不敗，必定把握地利優勢，搶呢場「6分波」。不過，論往績拿玻里一向食住森多，加上射手希古恩腳風超順，作客亦唔赦對手，激鬥下首選入球大。

（TVB 301周二凌晨4時直播）
歐聯入場券前哨戰

森多利亞今季可以大部分時間盤據前4，皆因主場表現出色，6戰4勝2和，同祖雲達斯、羅馬成為僅有3支主場未敗球隊，今仗又係佢哋搵食時候。森多利亞教練米赫洛域雖然後衞出身，但戰術思維進取，喜用3前鋒陣式，由艾達馬田斯、奧卡卡卓卡、加比亞甸尼合力攻堅，3人雖星味欠奉，但勝在勤力跑動，衝散對手防線。森多近兩次主場分別3比1擊敗費倫天拿，2比2打和AC米蘭，盡顯攻力強橫，唔驚同拿玻里駁火。

拿玻里上周中提早獲得歐霸盃分組賽出線資格，可專注聯賽，球隊現時要鞏固意甲前3，力爭下屆重返歐聯，最好先打謝主要競爭對手森多利亞。
拿玻里靠希古恩數胡

拿軍最大殺着肯定係前鋒希古恩，呢位阿根廷國腳近5場意甲都有波入，共轟入7球，銳不可當。

值得一提雙方最近10次對壘，拿玻里獲得7勝2和1負壓倒性成績，包括上季作客大勝5比2，心理上已佔盡優勢，相信會繼續喪攻對手，兩隊都咁進取，一場入球騷可期。