森多 拿玻里細均力敵

猪拉多纳

意甲周二凌晨好戲碼，由森多利亞主場迎戰拿玻里，玩1.74倍入球細較實際，事關後者前線明顯出現問題，而教頭賓尼迪斯仲周圍放風要入貨，淨係靠希古恩搏殺，未必開到入球騷。

（TVB301及廣東體育周二凌晨4:00直播）
加比亞甸尼腳風回落

森多利亞近況回落，近6戰僅錄得1勝4和1負，當中射手加比亞甸尼已經連續5場食白果，況且對手拿玻里都係現時意甲嘅頂級球隊，普通球員唔容易攻破佢哋嘅大門。再睇埋雙方近4次對賽，就合共開出3次入球細，期間森多仲要有3場冇波入，真係未必咬得入對手。

日前喺歐霸盃作客以0:0摸和布拉格斯巴達嘅拿玻里，雖然話米捷最近受傷，其實對佢哋嘅真正影響唔係太大，當然佢唔踢得，始終令賓帥喺前線少咗個人調動，淨係靠希古恩入波，隨時搞到佢腳仔軟，特別係佢季初曾經養傷，賽程太密點都會影響佢表現。
賓尼迪斯放風買箭頭

事實上，賓尼迪斯已經知道唔對路，最近四圍放風要買新攻擊好手，除咗睇中祖雲達斯嘅基奧雲高，禾夫斯堡嘅比列錫外，就連廣州恒大淘寶嘅艾傑臣，都係佢哋嘅收購目標，證明佢哋前線唔多夠人用，未必有本錢同森多對攻，玩入球細好過。