艾美利亞冇火 讓唔起「簡奴」

猪拉多纳

今晚西甲有場下游分子對戰，由艾美利亞主場迎戰華歷簡奴。論狀態兩軍同樣麻麻地，雖然艾美利亞有主場之利，但實情佢哋喺地頭根本冇乜威力，讓唔起平半，揀華歷簡奴個1.81倍下盤好過。

（開賽時間：周二凌晨3:45）
華歷簡奴上季對賽贏晒

艾美利亞上仗作客賽和CF格蘭納達0:0，好聽啲叫終止4連敗，但難聽啲咪連續6戰不勝囉。以為佢哋回師主場可以反彈？好難喇！事關呢班波今季主場仲未開齋，6戰夾埋入得嗰5球，嗰位首席神射手－中場艾加文迪斯，查實只係入咗2粒咁大把，最重要係艾美利亞今仗仲有另一中場大將拉蒙阿施斯坐波監，咁嘅鋒力學人讓波？咪玩啦！

對家華歷簡奴表現都唔係Sharp，好就好在佢哋上季對賽贏晒，今仗即使有中場巴爾拿停賽，都仲有法泰奧復出可以頂上，將影響減到最低。咪忘記佢哋一對箭頭巴迪斯達奧、貝爾奴最近輪住發威，至今各自轟入6球，鋒力好過對手艾美利亞多多聲，今晚佢哋有得受讓，撐下盤最少有半格執。