水晶宮藉地利發維

猪拉多纳

英超車路士榜首一枝獨秀，爭標形勢冇乜驚喜，反而下游鬥得相當激烈，其中水晶宮同阿士東維拉近期頻頻有分落袋，兩軍今晚周中快車，正面交鋒無疑係護級前哨戰。普遍莊家比較睇好水晶宮，呢班波主場往往踢出超水準，鬥同級數對手未驚過，水晶宮小讓平半合理，上盤可取。

（now 633及660周三凌晨4時直播）

水晶宮上季已扮演「攔路虎」角色，季尾令車仔、利物浦失分，改變爭標局面，成為曼城嘅「恩人」。雖然水晶宮今季成績麻麻，但呢班波夠鬥心，即使遇到強隊踢落並唔失禮，對住阿仙奴、車仔、曼聯，都係僅輸1球，早前更反勝利物浦，踢出今季代表作，愈來愈有信心。水晶宮陣中有唔少球員効力過大球會，質素有一定保證，遇上維拉，獲得秤先可以理解。阿士東維拉近期總算止血連和3場，但表現始終未能令人信服，一周雙賽兼連續兩場作客，今仗未必再頂得住。
般尼「細」守紐卡素

另外，新升班嘅般尼開始喺英超企穩陣腳，主場對近期大勇嘅紐卡素，莊家開平手盤，反映屬於五五波，兩隊攻力唔強，寧願揀入球細。西布朗3連敗，因為遇上強隊，今仗主場對韋斯咸，西布朗要讓平半，可見莊家睇好佢哋可以反彈，上盤跟得過。

（now 625周三凌晨3時45分直播）