馬賽發惡打羅冇甩拖

猪拉多纳

「瘋子」比爾沙玩轉法甲！呢位阿根廷籍名帥今季執教馬賽，以主攻及壓迫踢法，打出新局面，現時力壓富豪球會巴黎聖日耳門，盤據榜首之位，力爭重奪失去5年嘅聯賽冠軍寶座。今晚法甲周中快車，馬賽作客下游球隊羅連安特，冇理由失拖，簡單要客勝。

（TVB 302周三凌晨2時直播）

比爾沙曾經教過愛斯賓奴、畢爾包等球會，亦帶領過阿根廷及智利出戰世界盃決賽周，教波功力毋庸置疑。由於佢言行出位，而且戰術思維大膽創新，因而有「瘋子」之稱。比爾沙成名作必定要數3313陣式，佢亦將呢套踢法帶到馬賽，成效立竿見影，踢15場聯賽已攻入32球，比上季同期多9球，正係佢哋可以排榜首嘅主因。事實上，比爾沙曾經率領平平無奇嘅畢爾包打入西班牙盃及歐霸盃決賽，最叻化腐朽為神奇，相信馬賽今季絕非虛火，值得長追。
羅連安特近3交手全敗

羅連安特雖然兩連勝，但對手只係弱隊朗斯同圖盧茲，不足為信，遇到勁旅馬賽，難再有運行。雙方近3次交鋒，羅連安特全敗兼冇波入，恐怕今仗都係要束手就擒。