修咸頓--1唔怕廠

猪拉多纳

剛被破主場不敗身嘅三哥修咸頓，作客硬撼阿仙奴，「兵工廠」雖然啱啱贏番場止瀉，但付出再傷多三件嘅代價，更可能要勞動「法老」法米尼客串左閘，都咪話唔牙煙，個陣咁殘冇本錢讓波，斯維寧願捧番「聖人」修咸頓讓球客勝。

（now 622周四凌晨3時45分直播）

「兵工廠」喺英超名副其實係「傷兵廠」，最恐怖之處係經常出現傷追人情況，成班兵排住隊入廠。原本以為箭頭基奧特及中堅哥斯尼復出會好啲喇，點知上仗作客小勝西布朗終止聯賽兩連敗之役，兩名左閘蒙利爾、基蘭基比斯及阿歷士張伯倫先後中招，前兩者傷情唔多樂觀，相信今仗好披甲，即係話陣中冇晒正宗左閘。
阿仙奴左閘傷晒好頭痕

有傳主帥雲格焗住要搵法米尼頂住，8年前佢臨危受命客串左閘，帶領阿仙奴殺入歐聯決賽，令人驚喜。不過此一時彼一時，呢位法國中場硬漢已年逾30，回追速度大不如前，至於右閘哥林張伯斯乃修咸頓青訓產品，「聖人」對佢熟晒路，佢同「法老」撞正突破力強嘅修軍沙迪奧文尼及尼達利基尼，淨係輸速度都輸死喇。

異軍突起嘅修咸頓開始回落，已連續兩場失分，上仗慘吞曼城三蛋更被打破今季主場不敗金身，今仗仲有中場核心舒尼達連拉傷肌肉肯定缺陣，領隊朗奴高文吸取上仗下半場忽然變陣三後衞搞到大敗嘅教訓，預計今仗會穩陣行先，加上「聖人」今屆英聯盃曾作客反勝阿仙奴，心理上稍佔優勢，絕對有力全身而退，仲有得受讓，識揀梗係揀讓球客勝。