巴塞 馬體會齊劏丙組兵

猪拉多纳

生牯仔落場博表現

今晚西盃續演第4圈首回合，上屆亞軍巴塞隆拿作客丙組仔侯爾斯卡。雖然呢類賽事「地上最強」都唔會精銳盡出，但正好畀新仔蒙尼亞艾哈達迪、拉芬拿艾簡達拿等爭取表現嘅機會，呢班生牯仔一定搏甩髀氹主帥安歷基，就算讓球主客和巴塞要讓兩球，斯維照撐讓球客勝。

（now 632及TVB 13周四清晨5時直播）

西盃第4圈強隊通常出戰低組別球隊，亦會讓得好辣，強隊容易贏波輸盤，因此玩呢類強弱懸殊賽事，需要特別了解球員嘅作戰心態。巴塞有幾勁唔使多講，但今仗只係對住弱旅侯爾斯卡，預計鋒線「MSN」美斯、蘇亞雷斯及尼馬會避戰抖吓，當然殺雞何需用牛刀，巴塞青訓出晒名，佢哋後備席仲有大把好嘢可用。
蒙尼亞艾哈達迪孭到飛

好似季初表現堅Sharp醒嘅新仔前鋒蒙尼亞艾哈達迪，佢更係西甲處子戰有士哥，並以18歲357日之齡，成為「地上最強」史上第3年輕嘅入波球員，可惜自蘇亞雷斯刑滿復出後，呢位新星上陣機會大減，趁住「咬人蘇」休息有得落場，艾哈達迪今仗仲唔加多兩錢肉緊搏殺咩？而今季跟隨主帥安歷基從切爾達返巴塞嘅中場拉芬拿艾簡達拿，亦要趁機爭取表現，證明自己唔比沙維、恩尼斯達等大師兄遜色，仲有沙治羅拔圖、杜格拉斯彭利拿等生牯仔等住上位，呢班「新世代」戰意十足，整定丙組仔侯爾斯卡冇運行，巴塞要贏三粒或以上冇難度。
馬體會-2讓客照追

至於另一勁旅馬德里體育會，同樣作客丙組仔賀斯比圖勒，相信文迪蘇傑、基沙文、高甸等主力會獲得休息，當然代替佢哋嘅魯爾占美尼斯、阿利斯奧施斯等質素唔曳，對住近六仗僅一勝嘅賀斯比圖勒可予取予攜，讓球主客和要讓兩粒，照揀馬體會讓球客勝。

（周四凌晨3時開賽）