車仔雙箭衝刺大騷哥利

猪拉多纳

迪哥停賽 寸王變陣

英超今晚上演重量級「倫敦打吡戰」，車路士喺主場對熱刺，玩1.7倍入球大比較穩陣。雖然車仔有射手迪亞高哥斯達停賽，但領隊莫連奴講明會變陣，安排杜奧巴同雷米打雙箭頭，擺明要同熱刺鬥攻，大家等睇入球騷啦！

（now621台周四凌晨3:45直播）

車仔日前作客被新特蘭守和0:0，屬於佢哋今季首次冇波入，但其實韋利安有腳射中柱，整體表現唔算太差。當然啦，大家肯定擔心，今場車仔有射手迪亞高哥斯達停賽，火力受影響。不過各位諗到嘅，寸王莫連奴自然考慮到，賽前佢已經講明，今場會派杜奧巴搭雷米打雙箭頭，避免再次冇波入。

藍戰士3中場後上力強

除此之外，其實車仔中場法比加斯、夏薩特同奧斯卡杜斯山度士，全部有強大嘅後上入球能力，即使唔齊腳，佢哋都可以挺身而出幫手入波。當中夏薩特更講過，無論係皇家馬德里抑或曼聯撬佢過檔，佢都冇興趣離隊，因為佢覺得車仔最啱佢發揮，相信今場會加多兩錢肉緊入波，表達佢對車仔嘅忠誠，更有利升出1.7倍入球大。

熱刺普捷天奴唔玩死守

對家熱刺日前以2:1反勝愛華頓，射手蘇爾達杜終於射入個人今季首個聯賽入球，信心應該會好番啲。仲有呀，熱刺領隊普捷天奴唔鍾意玩守勢足球，上季佢帶領修咸頓出戰車仔，作客先輸1:3，主場再吞3隻光蛋，睇怕今場會繼續以大無畏精神，同車仔鬥攻死過，鍾意睇入波嘅話，值得大家捱眼瞓呀！
盤路解碼

熱刺近6場5次開入球大。
Data King：熱刺連續14場入波

‧兩隊近5次對賽有4場開大。

‧車路士過去喺英超對熱刺有24勝17和3負。

‧車仔今季不敗15勝5和。

‧熱刺連續14場有波入。
乜都玩錦囊：熱刺半場易失波博「半大」

如果大家覺得車路士對熱刺夠開入球大，其實半場入球大都一樣抵玩，因為熱刺不時喺上半場失波，連盃賽近6場得2次半場保持清白，加上佢哋本身進攻火力唔弱，要同車仔喺上半場入夠2球，其實唔係好難，半場入球大有2.45倍抵博。