馬體會「-2」照殺 巴塞隆拿「半和」格

猪拉多纳

快車之夜繼續有西班牙盃上演，西甲衞冕隊伍馬德里體育會將喺第4圈造訪丙組仔賀斯比圖勒。咪以為雙方實力差天共地，「床單兵團」就會輕敵，主帥施蒙尼尋日特登拉隊去人造草場練波，等班球員熟習去到賀斯比圖勒地頭會係咩環境，今晚就算只係派阿利斯奧施斯同魯爾占美尼斯等副選落場，都夠殺敵有餘，讓到「-2」照捧1.98倍「讓客」。

（開賽時間：周四凌晨3:00）

馬體會近期愈戰愈勇，對上9場波錄8勝1負，最近喺西甲同歐聯戰場更加連贏3場。據西班牙傳媒透露，施蒙尼尋日安排文迪蘇傑、佐治高基同阿達杜倫等主力輕鬆操練，一班喺上輪聯賽鬥拉科魯尼亞嘅後備球員，就着上特製波砵，去人造草場練波，希望球員盡快熟悉賀斯比圖勒個人造草場係點踢，備戰工夫勁認真。

據施蒙尼透露，除咗常規主力好似中堅高甸，以及法國翼鋒基沙文之外，正選陣容將會係全副選兵，但佢哋嘅所謂副選兵，係前馬拉加隊長兼右閘捷西斯加美斯、上季正選馬里奧蘇亞雷斯、去季意甲「助攻王」阿利斯奧施斯同墨西哥射手魯爾占美尼斯，呢班友仔踢西甲都夠揪，要炒起丙組仔綽綽有餘啦！
賀斯比圖勒預咗輸畀馬體會

賀斯比圖勒家陣喺所屬聯賽排第13位，最近兩場波都失分，足足畀愛斯賓奴B隊同薩拉戈薩B隊轟入5球，西丙都踢唔掂，點喺馬體會身上搵着數呀？教練傑高拉美利斯賽前批評陣中球員質素曳，又話對住馬體會唔求成績，只係希望一班球員同6,740名主場球迷Enjoy場波，聽佢咁講似係扯定白旗，睇怕閒閒哋吞3、4蛋都似。
侯爾斯卡薯仔田頑抗巴塞

另邊廂，26屆西盃盟主巴塞隆拿就會作客丙組嘅侯爾斯卡，巴塞教練安歷基講明會輪換，有4件o靚仔仲被提升上甲隊，預計前鋒蒙尼亞艾哈達迪、辛度拉美利斯同中場拿傑迪錫等都會落場。侯爾斯卡想頂得住巴塞就冇乜可能，但話晒佢哋係丙組「三哥」，最近4輪聯賽又贏晒，近況咁好未必會輸大鑊，博佢哋半場喺受天雨影響搞到爛溶溶嘅主場守和巴塞，要3.6倍半場和。

（now632台及TVB13周四清晨5:00直播）