FC悉尼主場強勢有得「輝」

猪拉多纳

FC悉尼今日會喺澳職主場火併珀斯光輝，悉尼今季未輸過，珀斯聯賽做一哥，兩軍今場對決必有一番龍爭虎鬥，卡爾萬睇好佔主場之利嘅悉尼，1.95倍主勝咪錯過。

（有線64及203周四下午4:30直播）
珀斯光輝主將或缺陣

悉尼今季8戰4勝4和未嘗一敗，防守力更係全澳職最強，雖然佢哋今場唔輸嘅話，將會追平球會最長不敗紀錄，但後衞柏迪保積賽前呼籲球迷踴躍入場支持，聲勢贏晒自然盡砌爭勝！雖然佢哋有中場艾希爾菲上輪重創提早收咧，好在中場核心迪米查捷域波監刑滿復出之外，陣中唯一未開齋嘅前鋒史美斯，過去効力珀斯光輝多年熟晒路，今戰實搏盡求破入球荒！

客軍珀斯光輝上輪作客被獅吼完場前逼和，搞到5連勝斷纜，中場主將靴斯更整傷腿筋今場未必踢得，影響較悉尼後衞懷奧停賽大得多。再者大本營喺西澳嘅珀斯，上輪遠赴布里斯班之後，今場又要飛去悉尼，東奔西跑狀態難免受影響，演出隨時走樣。