紅途末路 雙藍爭標

猪拉多纳

藍戰士 -1打鵲易
‧英超聯賽‧

英超變天，雙藍爭霸！「深藍」車路士今季一開咧即開行Turbo帶出，衞冕嘅「天藍」曼城近期回勇急起直追，兩軍逐漸放甩曼聯、阿仙奴及利物浦等「紅衫軍」，一改以往「紅紅」或「紅藍」打崩頭之勢，只差6分嘅兩大土豪今晚分戰早、尾場，車仔作客對紐卡素，曼城就喺主場迎戰愛華頓，齊齊全力搶分，正式揭開「雙藍」爭霸新格局！

「藍戰士」車路士今晚英超早場作客「喜鵲」紐卡素，車仔有射手迪亞高哥斯達刑滿抖夠復出，猛虎出柙火力狂升呢，相反紐卡素周中作客只能打和般尼，狀態跌Watt兼傷兵成籮，此消彼長下擋唔住呢架「極速跑車」，車仔大有機會破紀錄邁向24場不敗，讓球客勝咪錯過。

（now 621周六晚8時45分直播）

迪亞高哥斯達出晒名係冇品茅柴。由於上周畀新特蘭悶和再攞黃牌，令「迪哥」儲夠牌自動停賽，周中聯賽快車對熱刺冇得打。傷愈冇耐嘅「迪哥」難得坐波監唔使踢，變相可以抖足成個禮拜，意味佢抖到夠出戰紐卡素，只要佢遠離傷患，等閒後衞都好難阻到呢隻「茅牛」。
莫帥誓破「聖占士魔咒」

紐卡素經過一波6連勝，開始有回落迹象，上周作客輸畀韋斯咸，周中快車亦只能打和弱旅般尼，其實之前「喜鵲」連場報捷，唔多唔少係打道氣，如今道氣洩咗，未必咁快可以打番起。畢竟佢哋仲有告魯爾、大衞辛頓、施安迪莊、路蘭度艾朗斯、奧巴坦及賴恩泰萊等成籮傷兵，主帥柏杜真係嗌晒救命。

車仔今季各項賽事共21仗未輸過，連同上季季尾兩場，只要今仗贏或和，便可打破該隊於07年1至4月及09年4至9月所保持嘅23場最長不敗紀錄，加上主帥莫連奴聯賽從未試過喺聖占士公園球場贏波，佢咁要威梗係唔衰得喇，就算有中場悍將尼曼查馬迪坐波監，都唔赦天殘地缺嘅紐卡素，不妨直取讓球客勝。