藍月亮 吼半場大

猪拉多纳

「藍月亮」曼城今晚英超守尾門，主場對「拖肥糖」愛華頓，有阿古路神勇，曼城「愛」做大騷！呢位阿根廷射手入波停不了，周中又轟入兩球，高踞射手榜No.1，勒都勒唔住。由於曼城下周中歐聯要同羅馬決生死，今晚勢必先下手為強，盡快入波奠勝，以免夜長夢多浪費體力。愛華頓前鋒盧卡古亦屬於「快槍手」，連歐霸盃在內，今季7個入球有6球喺上半場攻入，相信會迅速入局，同阿古路駁火，如果嫌大盤1.5倍回報低，可博2.15倍半場大。

（now 621周日凌晨1時30分直播）
愛華頓夠火力

曼城下周中歐聯作客羅馬，兩隊只能活1隊，今場英超理應有保留，但問題係佢哋已落後榜首車路士6分，再失分就好難追，相信呢支富豪球會仍會力搶3分，估計會爭取上半場領先，然後控制戰局到尾，如果策略成功，屆時甚至可以提早換走阿古路等主力，畀佢哋休息。

阿古路今季弗到爆，今季聯賽已累積14個入球，以愛華頓防線實力，招架唔住佢。不過，曼城近6仗有5仗上半場已失守，有利開半場大。

「拖肥糖」成績麻麻，但盧卡古演出仍然搶眼，呢位比利時射手近4仗3仗有波入，3球都係上半場攻入，非常搶韁，仲有著名射手伊度奧助陣，愛華頓入波本錢充裕，勢必對曼城大門構成重大威脅，半場入波機會好高。