新帥鬥穩陣雙史吼細盤

猪拉多纳

周六早場直播仲有史特加主場對史浩克04，兩軍近期都換咗教練，兩位新帥都同今仗對手有淵源，而且都係穩陣派，今場對攻嘅可能性唔高，細盤有2.1倍值得一試。

（有線61及201台周六晚10時30分直播）

史特加今季開得曳，較早前曾跌至包尾位置，會方急急搵番上季救火教練史堤芬斯領軍，佢上任後首仗即幫助球隊作客大勝弗賴堡，不過該役弗賴堡防線晨早散晒，唔可以作準。61歲嘅史堤芬斯向來係穩陣派，而且深悉今仗對手史浩克虛實，佢曾經兩度執教史浩克，並當選為該會史上最佳教練，現時史特加三線人腳都唔算平均，仍然喺降級區位置，當然唔會急功近利，今仗部署會以穩為先。

史浩克新帥迪馬堤奧對史特加並唔陌生，喺1998年球員時代，佢効力車路士時曾經喺歐洲盃賽冠軍盃決賽對過史特加，車路士最終贏1比0捧盃。今次接掌史浩克教鞭後，雖然主場成績唔錯，但兩線作戰作客三連敗差到暈，今仗要打破作客冇分嘅宿命。
迪馬堤奧用五個後衞

迪馬堤奧教波以守起家，前年做臨時主帥帶領車路士贏得歐聯冠軍，依家史浩克作客輸到慌，因此近期作出針對性部署，起用五名後衞加強防守，紐斯泰達、卻治賀夫同隊長賀維迪斯合作踢三中堅，加上兩閘內田篤人同基斯甸富治斯，希望先做好防守，隨時大放悶氣，入波唔會多。