曼城Kun神 省爆愛華頓

猪拉多纳

勁過美斯 拍住C朗

講到世界最佳射手，C朗同美斯肯定最多人撐，不過曼城王牌前鋒阿古路，其實都有條件同兩大球王齊名！事關「阿Kun」狀態弗到震，喺英超已經射入14球排射手榜第1位，喺5大聯賽入面只得佢同C朗喺聯賽場均入球數字達1球或以上，堅勁！今晚曼城主場對愛華頓，相信又係阿古路嘅「騷貪」，讓球主勝有2.08倍，絕對可以一試！
林伯 耶耶輪住發威

阿古路之前喺歐聯分組賽對住德甲班霸拜仁慕尼黑連中三元，上場聯賽對新特蘭時又梅開二度，今季所有賽事加埋為曼城射入19球，仲堅過球王美斯，除咗C朗之外，根本冇人勁得過佢！一個阿古路驚唔夠？唔使怕，曼城另外三大炮台祖維迪、林柏特同耶耶托尼，近排狀態都係弗到漏，佢哋三個唔單止輪流入波，喺近6場比賽合共炮製6個士哥，可以幫「阿Kun」分擔入波重任，曼城一旦火力全開，連拜仁都未必係佢哋手腳，堅得人驚！

係，小妹唯一擔心嘅係曼城條後防線唔夠穩陣，皆因隊長高柏尼受傷，所以佢哋上仗對「黑貓」開波19分鐘已經失咗球波，不過咁喎，上次賴咗嘢，今次點都會醒醒定定嘅。更何況，曼城今晚有主場之利，佢哋今季6仗主場賽事只係輸過1場，威力有番咁上下，今晚面對排第11位嘅愛華頓，要贏波根本無難度！
櫻花 華倫爭搶伊度奧

論實力同狀態，愛華頓都輸晒畀曼城，前鋒伊度奧已今非昔比，傳聞1月會轉投西甲華倫西亞，日職嘅大阪櫻花亦想斟佢加盟，睇怕伊度奧嘅英超生涯就快完結，仲邊有心機同你搏命先？而且「拖肥糖」今季作客成績認真麻麻，7場作客波只係贏得嗰2場，今晚造訪氣勢如虹嘅曼城，就算受讓都無着數，誠意推介曼城讓球主勝！
Data King：藍月亮連開6口大

‧曼城過去主場對愛華頓錄44勝18和19負。

‧曼城連續6場開入球大。

‧愛華頓近7戰6次上半場冇失波。
盤路解碼：曼城連續3場「讓球主客和」開「讓球勝」。