日乙升班戰 平手撐千葉

猪拉多纳

日職冠軍塵埃落定，日乙今午亦會決定最後一支升班球隊！喺東京味之素球場上演嘅日乙升班附加賽——千葉市原對山形山神，兩隊絕對係五五波，平手盤不妨博一博大賽經驗豐富啲嘅千葉，事關佢哋個「主勝」有2.12倍幾好分吓。

（有線61、201周日下午2:30直播）

如果計近況，未必有人敢博千葉，因為佢哋十幾日前至响日皇盃2:3輸過畀山形，而且山形呢排唔知係咪食咗過期春藥，走勢勁到無倫，好似附加賽4強對住磐田山葉，踢到補時仲係和波，差唔多掹喉出局嗰陣，竟然畀佢哋個龍門山岸範宏棄關助攻頂入，2:1絕殺磐田入決賽，呢場勝仗除咗靠佢哋班人嘅鬥心，老實講亦係有啲運。

鬥志搭埋運氣，本來係天下無敵嘅，何況千葉咁多年嚟對住山形，總戰績只係5勝1和4負，根本冇往績支持。不過，大家唔好忽略一點，就係千葉聯賽排名高過山形，今日90分鐘打和，一樣可以攞到升上日職嘅資格。換言之，急住要贏嗰隊係山形，但係佢哋呢排連續踢咗兩場作客硬仗（日皇盃嗰場話就話中立場，實質亦唔喺自己地頭打），舟車勞頓，比起休養咗10日嘅千葉攰得多。疲兵仲要谷出去攻人，邊隊唔着數係人都睇到。
疲兵山形焗攻

雖則山形今場有前鋒林陵平、中場松岡亮輔復出，夠本錢打攻勢足球，問題係千葉都有前日本國腳森本貴幸重披戰袍，具備足夠條件打突擊。由於千葉係日乙升班附加賽常客，先後3次參戰，應付呢啲大場波嘅經驗，點都比首次入圍嘅山形豐富得多，加埋佢哋以逸待勞，況且捱埋呢90分鐘唔輸就掂，平手盤自不然係博千葉啦。