馬賽搶W保一哥位置

猪拉多纳

馬賽射手基格納上周五啱啱度過29歲生日，願望係乜？考慮季尾離隊喎！爭標路未夠一半就講啲咁嘅說話，其實都幾打擊士氣，無論如何，馬賽球員同球迷都要收拾心情，今夜迎戰實力一般嘅梅斯，3分志在必得，先坐穩一哥位置，其他遲啲再講啦。

（TVB302台周一凌晨4:00直播）

基格納今季入咗11球又獲法國國家隊重召，表現咁好，傾續約自然想叫價高啲，點知馬賽縮皮，會長拉布尼講明，月薪30萬歐元嘅基格納減三分一先有得傾，一切都係錢作怪，小弟認為，點拗都好，閂埋房門四四六六拆掂佢，公開講出嚟咪盞影響軍心，最重要係上下團結一致，邊個估到華布拿離隊後，今季成績不退反進吖？馬賽近期狀態有啲回落，上場對羅連安特被舊將佐敦阿休攻破，幸好巴黎聖日耳門一樣和波失分，先保住榜首，但再有差池隨時被迎頭趕上。加納國腳阿休養傷期間，用巴拉達威脅力減弱，尼高拉斯尼古路倦勤，後防莫雷拍洛芬尼又唔穩陣，即使係咁，整體戰鬥力依然遠遠高於梅斯。
梅斯作客腳軟

梅斯34歲老將馬隆達上場對波爾多十二碼宴客，0:0收場，可喜係中止3連敗，不過查實佢哋對上4場聯賽作客都腳軟，失咗9球，入波更加欠奉，今場想偷雞，就要寄望近5場入3球嘅馬里前鋒邁加生生性性。