紅軍大最啱素

猪拉多纳

贏波至出線 唔攻可以點?

歐聯B組生死大戰，利物浦主場惡鬥巴素利，只得4分嘅紅軍今場要出線16強就一定要擊敗對手，焗住要攻，一副有前冇後打死罷就嘅格局，到時巴素利就可以趁機攻陷紅軍空虛嘅防線，今場捧大盤啱數！

（有線61及201周三凌晨3時45分直播）

利物浦上場英超對住新特蘭悶和0比0，攻力冇錯係有問題，不過今場歐聯生死戰對球會財政收入關係重大，而且紅軍假假地都係5屆歐洲（歐冠盃及歐聯）冠軍，畀巴素利呢類歐洲二線隊踢出局都幾羞家，所以無論係睇錢定睇面份上，紅軍球員嘅戰意肯定比上場高幾廿倍，為贏波個個都會跑多幾步，搏晒命爭取入球。

科娜仲好記得利物浦04/05球季，又喺歐聯分組賽面臨出局邊緣，最後一戰面對希臘嘅奧林比亞高斯，紅軍喺落後1球嘅情況下反勝對手3比1，其實當時嘅紅軍攻力都唔算勁，但就憑住無限嘅戰意同對手死過，證明鬥志有時比球員技術同戰術部署更為重要。為咗激勵士氣，領隊羅渣士今場會搵番「神奇隊長」謝拉特踢正選，始終有呢位德高望重嘅隊長壓場同喝住班隊友，其他球員一刻都唔敢放鬆之餘，見到隊長在場都淡定啲，槍口一致對準巴素利。
巴素利有力破利物浦大門

不過，瑞士嘅巴素利並非善類，呢隊波出名青訓勁，出過巴塞隆拿中場拿傑迪錫、拜仁慕尼黑翼鋒梳頓沙基利、拿玻里中場恩拿等球星，依家就有法比安費爾同安保路兩名有潛質嘅年輕球員，再配合球隊神射手舒基辛加殊，攻力一啲都唔弱。須知利物浦喺防守上同04/05球季嗰隊差得遠，嗰陣紅軍有希比亞同加歷查兩位後防大佬鎮住，兩閘懷斯同芬倫防守亦穩陣，依家就係史卡迪爾拍高路托尼，前者成日毛手毛腳易輸12碼，托尼就轉身慢，兩閘格連莊臣同艾拔圖摩蘭奴都係攻強守弱之人，紅軍今場好易掛住進攻而搞到後防空虛，畀巴素利趁乘虛而入，大盤值捧。