馬體會受讓有買趁「祖」

猪拉多纳

默契和波齊有着數

歐聯嚟到分組賽最後一輪，最緊要識計數，A組祖雲達斯主場對馬德里體育會，祖記和波就可以出線，而馬體會亦可穩奪小組首名，隨時「默契」悶和，皆大歡喜，和局賠率壓低至2.8倍，入球細得1.46倍，大家都知乜嘢事啦！事實上，以意大利球隊老謀深算嘅保守作風，祖記未必去盡爭勝，加上論實力佢哋根本低馬體會半線，祖記要讓平半，細鬼捧馬體會下盤，當然和波亦可兼顧。

（有線64及203台周三凌晨3時45分直播）
祖雲達斯和波夠數

祖記領先第3位奧林比亞高斯3分，但因對賽成績不及對手，所以今仗起碼要有1分落袋先至可以穩奪出線權。以祖記今季主場8戰全勝戰績，要保不敗唔困難，但想贏波就唔易嘞，皆因意甲水準每況愈下，強如祖記去到歐聯戰場往往陷入苦戰，更何況今仗對手係上屆歐聯亞軍馬體會，祖記教練阿里基應有自知之明，採用穩陣戰術，但求順利出線，贏唔贏波並唔重要，故祖記讓波唔多合理。

馬體會已經確定出線，但如果今場淨輸兩球，就會被祖記搶走小組首名位置，屆時16強抽籤就要面對其他小組首名勁旅，條路會難行好多，因此今仗「保首」大過天。睇番馬體會最近豪取5連勝，狀態弗爆，整體實力亦喺祖記之上，教練施蒙尼又曾意甲打滾多年，對祖記非常熟悉，要全身而退難度唔大，下盤真係有買趁早。

鬼Sir有計 張志德

本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知。