10年後今日再靠謝拉特

猪拉多纳

今晚歐聯B組賽事，現時落後次席巴素利兩分嘅利物浦，坐鎮主場與巴軍正面交鋒，只要贏波便可過頭與皇馬攜手出線，要形容咁重要生死戰嘅金句多籮籮，背城借一、唔贏唔得、唔贏會執笠等。Peter認為紅軍主帥羅渣士於上仗對新特蘭，特登收起「神奇隊長」謝拉特嘅做法係正確，還記得10年前12月嘅歐聯分組賽末仗，紅軍就係靠謝拉特嘅救命入波勇挫奧林比亞高斯驚險晉級，隨後殺入決賽，更喺落後3球劣勢下，又係佢身先士卒追番粒，最終導演一齣「伊斯坦布爾奇迹」擊敗AC米蘭捧盃，呢位神奇隊長絕對係嗰屆封王嘅英雄。
成敗關乎羅帥烏紗

10年過後，謝拉特已經三十有四，上仗抖抖等佢養精蓄銳迎戰巴素利咁關鍵之役，非常明智。畢竟「謝老四」都係頂級球星，Peter亦對佢有信心，但少少隱憂係巴素利行軍速度極快，10月頭就係憑呢招喺主場贏過紅軍，正如英文有句Speed has no slump（速度係冇低潮）。因此利物浦一定穩守行先，唔好貿然谷晒上去進攻，萬一唔覺意先輸一粒就弊傢伙，始終仲有成場波時間，紅軍要當決賽咁踢保持耐性，睇準機會先作出致命一擊，咁樣一嚟羅渣士既可保住烏紗，紅軍粉絲亦可開心過聖誕。
金句：紅軍難得坐司機位，今仗唔贏還待何時？

歐聯不夜天 黃興桂