曼城折腰難頂雌狼

猪拉多纳

E組生死戰 4主力唔多掂

歐聯最後一輪分組賽上演E組生死戰，羅馬喺主場對曼城，讓平半值博。近排「雌狼」已經重新上力，上場聯賽更收起大部分主力諗住打硬仗，相反曼城有阿古路傷埋、耶耶托尼停賽，大衞施華同高柏尼又啱啱至傷愈，可能讓足4件主力打斷條尾龍骨，咁點搞呀？

（有線61及201、中央5台周四凌晨3:45直播）

經過一輪頹勢，最近羅馬已經翻生，目前喺意甲只係落後榜首嘅祖雲達斯3分。日前羅馬喺聯賽主場以2:2打和薩斯索羅，的確令人失望。不過大家要留意，其實佢哋喺半場落後兩球，兼且有副隊長迪羅斯被逐嘅劣勢下，比賽尾段靠中場拿積連入兩球追平，證明鬥心冇得彈。
羅馬鬥心強聯賽留力

再講，羅馬上場收起大部分主力，雖然前鋒謝雲奴叫做有後備上陣，但隊長托迪連1分鐘都冇踢，近日佢更加話，依家自己喺意甲得237個入球，位列史上入球最多第2位，希望打破埋施維奧比奧拿嘅274球紀錄至退役。咁有火，難怪佢今季仲咁弗，今場佢射爆曼城大門都唔奇。
曼城入波爭出線焗攻

另一方面，曼城反彈力度更加大，可惜，日前佢哋喺主場以1:0砌低愛華頓，射手阿古路喊住傷出估計要休息4個禮拜。中場耶耶托尼今場歐聯要坐波監，指揮官大衞施華、隊長高柏尼、費蘭甸奴、祖維迪都係剛剛康復，星期二至操咗一課，出得都冇態啦，主力陣容簡直好似畀人打斷條尾龍骨一樣，真係唔值得亂撐。

根據形勢，E組嘅拜仁慕尼黑肯定首名出線，曼城、羅馬同莫斯科中央陸軍同得5分，如果拜仁喺主場幫手打沉中央陸軍，曼城對羅馬拎到2:2或以上嘅和局，都可以憑較佳對賽成績出線（首循環踢成1:1），咁即係話曼城想出線首先要入波，作客焗攻更加牙煙。
盤路解碼

曼城近7場6次開入球大。
Data King：曼城作客意大利4戰不勝

‧羅馬連續3次主場對英超球隊獲勝。

‧曼城過去作客意大利球隊得2和2負。

‧曼城已連贏5場。

‧曼城近7場得1次上半場冇波入。
乜都玩錦囊：兩隊旺「半場大」值博

現時形勢羅馬、曼城同莫斯科中央陸軍同得5分，3隊都有權爭出線，撞啱羅馬同曼城好鍾意上半場入波，2.55倍「半場大」值博，畢竟羅馬近5場有4次開「半大」，曼城近7場都有5場呀！