曼城獵殺狐「李」

猪拉多纳

6連勝強勢 僅差榜首3分

上輪英超爆到七彩，車路士輸畀紐卡素被破不敗身；阿仙奴仲離譜，對住史篤城開波19秒就失波，最後2:3落敗；利物浦就打回原形摸和新特蘭；唯獨曼城擊敗愛華頓保住熱W，睇嚟上個禮拜啲熱門客都苦口苦面。「藍月亮」前幾日喺歐聯贏波後已錄得6連勝，今晚作客「魚腩」李斯特城，2.15倍「讓客」可追！ （now622台周六晚11:00直播）

日前喺歐聯生死戰惡鬥羅馬，雖然首席射手阿古路因為膝部韌帶受傷冇得落場，中場核心耶耶托尼又要坐波監，但曼城冇咗呢兩名主將都可以淨勝「雌狼」兩粒，就知佢哋嘅戰意同實力有幾咁頑強啦！佢哋以歐聯小組次名躋身16強後，淘汰賽要到明年2月至開打，現時可以集中火力喺聯賽搶分。
歐聯歇冬 專心搏英超

「藍月亮」目前落後「英超一哥」車路士3分，唔使問嚟緊每場波都會搏到盡，務求喺「藍戰士」手上搶番個榜首位置！正值6連勝強勢嘅曼城，係今季聯賽作客演出最好嘅球隊，8場加埋入咗20球，鋒力絕對唔嘢小，今晚造訪榜尾嘅李斯特城就算讓到一球，要贏盤都易過借火！
榜尾李斯特城 10戰得2分

對家「狐狸」李斯特城表現低迷，已經超過兩個月冇贏過波，對上10場聯賽取得2和8敗嘅劣績，當中有6場仲要衰到連蛋都破唔到。「狐狸」今晚雖然喺自己地頭出戰，但家陣跌到落榜尾，成班球員踢到冇晒心機，上場主場出擊對住表現飄忽嘅利物浦都輸1:3，根本冇主場威力可言，今場受讓都制唔過，心水推介曼城「讓球客勝」！
盤路解碼

曼城今季英超作客8戰5次贏對手多過1球，贏盤率達62.5%。
Data King：「狐狸」球會史上最差開季

‧「藍月亮」連續8次作客李斯特城未輸過。

‧曼城中場耶耶托尼近4場英超入3球。

‧李斯特城今季聯賽15戰得10分為球會史上開季最差。