韋菲特邦尼態勇 撐天鵝炒刺

猪拉多纳

地頭龍誓破宿命

周日英超壓軸戲碼，會由史雲斯主場火併熱刺，雖然「天鵝」過往喺英超場合從未贏過熱刺，不過佢哋今季主場演出勁硬淨，戰績僅次車路士同曼聯之後，今輪再遇「剋星」，撞正對手鋒線啞火同埋近況低迷，絕對係打破「宿命」嘅好時機，讓平半上盤博得過。

（now621台周一凌晨0:00直播）

史雲斯今季嘅主場戰績惡到痹，英聯盃連同英超10戰取得7勝2和1負，唯一輸波嗰場最大原因係踢少個，但都頂到最後僅以0:1不敵修咸頓，落敗情有可原。
連盃賽地頭10戰7捷

「天鵝」今場雖然有門將法比安斯基停賽，要由查美爾頂檔把守最後一關，好在佢哋亦有左閘尼爾泰萊坐完波監，中堅費達歷高費南迪斯亦預計可以傷愈復出，特別係箭頭韋菲特邦尼狀態弗到漏，近4場聯賽斬獲3球，「天鵝」攻守都值得信賴。

至於客軍熱刺則有前鋒艾迪巴約日前因為私事飛返祖家多哥，今場未知趕唔趕得切返嚟披甲，雖然「多哥王子」喺11月中開始一直養傷到家陣，就算可以復出都未必夠狀態，實際影響唔算太大，但熱刺近況曳就係鐵一般事實。
疲兵熱刺近3戰不勝

佢哋自從被車路士終止連勝強勢洩咗道氣之後，連續3場未贏過兼夾冇波入，最慘係佢哋喺早幾日歐霸盃先至飛完去土耳其惡鬥比錫達斯，今場又要再上征途去威爾斯硬撼史雲斯，東奔西跑頻頻撲撲，舟車勞頓，球員隨時搏到腳仔軟，相信都幾難延續鬥史雲斯嘅輝煌往績咯！