紅軍尼料絕地搶W

猪拉多纳

羅渣士踩鋼線跣腳即瓜

羅帥絕地一擊，唔贏唔得﹗歐聯分組賽出局、畀死敵曼聯大炒3蛋、創出50年嚟最差開局，利物浦領隊羅渣士依家嘅處境就好似踩緊鋼線咁，一失足就會「突然死亡」﹗周四凌晨嘅英格蘭聯賽盃8強賽事，紅軍作客英冠榜首般尼茅夫，吊緊命嘅羅帥今場冇得留力，誓要班子弟兵搏命爭勝，面對防守唔強嘅主隊，客勝有望﹗

（TVB 301周四凌晨3時45分直播）

即使嚟緊周日利物浦要喺英超硬撼阿仙奴，今場英聯盃紅軍都冇得留力，因為球隊依家極需要一場勝仗振奮士氣，難得面對實力次一級嘅般尼茅夫，絕對係扭轉頹勢嘅大好機會，而且對羅渣士嚟講，既然聯賽成績曳，國內盃賽就係佢唯一「續命」希望，如果連般尼茅夫都輸得，咁紅軍老細肯定會手起刀落，送羅渣士一程。
收起後防毒瘤博翻身

羅帥今場肯定會要求球員唔好輕敵，全力爭勝，派出大部分主力迎戰，不過後防三大毒瘤洛夫雲、艾拔圖摩蘭奴同老態盡現嘅謝拉特可能就會收起，確保唔會再因為佢哋嘅失誤而輸波，搵番傷愈復出嘅巴洛迪利打單箭頭，其實見到「巴神」上場對曼聯嘅表現已經較之前好咗，可惜面對嘅係「神龍」迪基亞，搞到未能取得聯賽處子入球，今場面對防守較弱嘅般尼茅夫，有望喺史達寧同菲臘比古天奴嘅支援下取得士哥。
般尼茅夫攻強守弱牙煙

的而且確，般尼茅夫喺少帥艾迪侯域帶領下成績愈嚟愈好，今季更大有機會取得來季升班資格，不過艾迪侯域崇尚主攻踢法，令到般尼茅夫攻強守弱，主場都一樣勁多失波，近4主場更場場失兩球或以上。面對同級嘅英冠球隊，般尼茅夫或者可以靠呢套贏波，但今場對住嘅係頹極都有一定實力嘅紅軍，分分鐘累死自己，主攻紅軍而搞到後防空虛，畀機會紅軍偷雞成功，一於捧客勝！