多蒙特未夠期割禾

猪拉多纳

問題多多 狀態低迷

德甲快車重頭戲多蒙特主場對禾夫斯堡，多蒙特正處於球會最低潮，教練高普出盡法寶都未能扭轉乾坤，佢哋今季幾乎每方面都做得比禾夫斯堡差，今晚多蒙特能夠拉成均勢已經算有進步，讓到半一實在過分，寧吼禾夫斯堡下盤。

（有線61及201台周四凌晨3時直播）

上輪作客不敵哈化柏林後，多蒙特踢咗十五輪聯賽輸咗九場，成為德甲輸波最多嘅球隊，一直以來都將責任攬晒上身嘅教練高普，賽後亦罕有咁大發雷霆炮轟球員表現，雖然佢聲稱今仗返到主場，會盡全力報答不離不棄嘅球迷，不過多蒙特告急已經唔係一朝一夕，成績始終冇起色，球隊問題多到一時間好難解決。

上仗復任正選嘅隊長曉姆斯狀態未足，防線固然不穩，最慘喺主力馬高列奧斯缺陣下，前線冇個交到貨，兩名貴價新兵恩莫比尼同阿祖安拉莫斯至今合共只入四球，今仗連中場米希達利恩都因傷缺陣，好難攻陷擁有質態兼優嘅比拿利奧、拿杜同列卡度洛迪古斯等，今季平均每場聯賽失球少於一球嘅禾堡防線。
禾堡上仗和波超唔抵

禾夫斯堡喺實幹型體育總監K阿羅夫斯同教練赫基合作產生良好化學作用，球隊戰績穩步上升，穩居拜仁之後排第二位，拋離其餘球隊最少六分（未計周三凌晨戰果），近十場聯賽贏咗八場，上仗主場雖失望地賽和升班球隊柏達邦，不過該役禾堡表現絕對唔差，只係冇運先後過唔到門楣、門柱同柏達邦門神古斯力挽狂瀾，下半場仲要輸個問題十二碼被追和，呢兩分失得極冤枉。不過賽後赫基聲言今仗作客西法倫球場有信心全取三分，以多蒙特目前喺狀態，根本讓唔起半一。