緬恩斯死守細悶親仁

猪拉多纳

德甲歇冬前最後一輪比賽，今晚獨腳戲先演緬恩斯主場對拜仁慕尼黑，拜仁喺前巴塞主帥哥迪奧拿手上屢創驚人數據，搞到隊隊都驚咗佢，一味主守踢消極足球，今晚係緬恩斯今年主場嘅謝幕戰，當然唔想大敗影響過聖誕心情，實行擺鐵桶陣輸少當贏，拜仁喺傷兵滿營下頻密作戰，亦志在控球同贏波，黑柴博2.55倍細盤。

（有線61及201台周六凌晨3時30分直播）

拜仁喺哥迪奧拿領軍下，除失落歐聯冠軍外，幾乎贏盡所有重要賽事，且數據屢創紀錄，佢至今帶領球隊踢咗50場聯賽，平均每場得2.64分，成為拜仁史上平均得分最高主帥，門將紐亞踢完16輪只失3球，上輪主場對弗賴堡拜仁創造嘅76%控球指數同31次射門，都係德甲新紀錄。
拜仁傷兵問題嚴重

雖然紀錄亮麗，但拜仁上仗狂攻之下都只入得兩球，剛為拜仁射入第100球嘅洛賓賽後話，場波只得一隊想好好咁比賽，擺明埋怨弗賴堡只顧防守。但事實上，拜仁實在喺德甲已經係外星球隊，其餘隊伍對住佢哋，愈開放鬥攻只有死得愈慘。喺擊敗弗賴堡後，拜仁已經向主場球迷謝幕，今仗作客輕裝上陣，球隊上仗贏波亦付出極大代價，三大主將中堅貝拿迪亞、中場沙比阿朗素同箭頭羅拔利雲度夫斯基先後勇戰傷出，前兩者今仗肯定缺陣，冇必要以大勝為目標。

緬恩斯近期狀態同運氣都欠佳，近8場聯賽未贏過只得4分，今晚面對班霸都唔敢奢望贏波，教練夏祖曼事先聲明會擺541鐵桶陣主守，前線只留岡崎慎司打突擊，雖然呢名日本國腳今季表現大熟大勇，但近季佢對住拜仁鮮有建樹，今晚好難旨意佢可以攻破紐亞十指關。