保頓大傷鋒半和好輕鬆

猪拉多纳

今晚英冠獨腳戲米禾爾主場對保頓，咪以為場波冇乜睇頭，波齡較長嘅朋友應該都記得邊位係古莊臣，呢個曾踢過車路士及巴塞隆拿嘅冰島名將喺保頓成名，已經36歲嘅佢最近回巢，保頓咁做並唔係出於尊重呢位名宿，畀佢返嚟等退休，而係近排大鬧前鋒荒，領隊連儂今場唔係靠古莊臣就係靠19歲小將干拿韋健遜攻堅，攻力唔慌勁，半場和有望開出。

（周六凌晨3時45分開賽）
希斯基加盟好事近

保頓自從改由前些路迪領隊連儂領軍後，成績有所改善，點知球隊近排唔知行咗咩衰運，前鋒輪住傷，借將祖美臣腿筋有傷要抖兩個月，跟住就到格力戴維斯受傷，上場對葉士域治再有20歲小將麥斯基頓中招，搞到連儂被迫起用年僅19歲嘅干拿韋健遜，除搵番冇班落嘅古莊臣回巢，更想羅致36歲前利物浦轟炸機希斯基，近日保頓官方twitter更上載呢位大舊中鋒操練相，睇嚟佢就快加盟，同古莊臣組高齡鋒線。連儂今場只得古莊臣同干拿韋健遜可用，一個太老一個太嫩，兩個都靠唔住，好彩保頓近三場都冇失波，防守叫做頂住。

米禾爾喺月初畀米杜士堡大炒1比5後，上場對白禮頓刻意加強防守，終於攞到難得嘅勝仗，今場應繼續呢套踢法，以守為先，上半場好有可能同保頓處於膠着狀態，保頓近五場皆開出半場和，今場一於再追！