歇冬前例贏氹擁躉 拜仁「讓客」埋齋報恩

猪拉多纳

德甲踢埋呢Round就進入歇冬期，緬恩斯今晚喺主場對拜仁，唔似爆得出。雖然緬恩斯嘅岡崎慎司今季交足貨，可惜隊友唔生性，呢位日本射手再叻都冇用。另一方面，拜仁連續5年歇冬前贏波氹球迷，當中有3場至少淨勝兩球，1.49倍「讓球客勝」諗得過。

（有線61、201及中央5台周六凌晨3:30直播）
緬恩斯中場主將缺陣

緬恩斯季初走勢好勁，可惜最近跌番落谷底，就算日本國腳岡崎慎司開季至今攻入8個聯賽入球，都只能夠幫緬恩斯守住中游位置，怪就怪其他隊友佗衰家。更慘嘅係佢哋有中場莊拿斯荷夫曼未好番，佢喺緬恩斯打回原形前攻入3個聯賽入球，缺陣影響有幾大，大家心中有數。
拜仁謝路美保定傷愈

拜仁周中喺主場以2:0砌低弗賴堡，中堅貝拿迪亞喺上半場傷埋，令到佢哋嘅傷兵問題進一步惡化，好在謝路美保定及時康復頂番佢個位，防線陣容依然似樣，加上惡爆鋒線得後備前鋒比沙路養傷，羅拔利雲度夫斯基、湯馬士梅拿、馬里奧葛斯、列貝利同洛賓求其有一個爆Seed已經夠贏。

咁都未算勁，睇番對上5個球季，拜仁喺歇冬前嘅比賽全部贏晒，即使上季要去踢世冠盃都冇例外，期間更加有作客以6:3大炒史特加，同埋主場以5:2打沉哈化柏林嘅代表作，證明拜仁好鍾意趁放假前大勝一場，等球迷可以開心歡度聖誕同新年，相信今年都會保持呢個優良傳統，拜仁「讓客」咪嫌熱！
盤路解碼

拜仁近5次聯賽作客3次開「讓球客勝」。