藍十字炒奧克蘭攞尾彩

猪拉多纳

世冠盃季軍戰，由墨西哥代表藍十字惡鬥新西蘭球隊奧克蘭。奧克蘭喺今次賽事表現出色，能夠打入4強可說是超額完成，但季軍戰面對上仗畀皇家馬德里大炒嘅藍十字，要再爆冷相信唔係一件易事。阿謙相信奧克蘭「神奇之旅」今仗應該完結，為求挽回面子嘅藍十字今仗會毫無保留全力爭取入球，捧讓球主勝。

（無綫翡翠台及TVB 13周日凌晨零時30分直播）

新西蘭代表奧克蘭上仗踢到加時先輸畀阿根廷代表聖羅倫素，但球隊表現唔錯可以話係雖敗猶榮，只係呢班波一路係「咬住度氣」嚟到4強階段，上場輸咗隨時會洩氣。奧克蘭今仗仍有葡萄牙前鋒祖奧摩利拿及南韓後衞金太旭仲未好番，可調動嘅人腳更少下，世冠盃「神奇之旅」隨時完結。
中場猛將復出夠殺

藍十字上仗畀皇馬大炒0比4，今仗季軍戰自然希望一洗頹風。藍十字早前嘅兩位中場傷兵沙維亞巴斯及祖奧洛查士已及時克服傷患，其中後者喺對皇馬時更已復出，今仗兩人大有機會齊齊正選上陣，配合射手曉高柏禾尼，有力攻破奧克蘭大門。藍十字今仗為求挽回面子，同時捍衞墨西哥足球嘅尊嚴，相信會全力搶攻爭勝，捧讓球主勝。