恩莫比尼嚟料 多蒙特「不」勝無歸

猪拉多纳

呢個周末係德甲歇冬前最後一輪賽事，踢埋呢兩晚就2015至再見喇！今晚其中一場焦點賽事係，兩支受到寒流吹襲嘅名牌球隊雲達不來梅同多蒙特對壘，雙方都希望全取3分，紓緩吓降班威脅先至過年。

（有線61、201周六晚10:30直播）

「蜜蜂兵團」多蒙特今季表現令人跌晒眼鏡，一對箭頭奧巴美揚同恩莫比尼更加成為眾矢之的。盛傳多蒙特1月會另搵前鋒救亡，呢對「受靶前鋒」為咗保住個飯碗，梗係要爭取最後機會騷「哥利」。高普已經明言要走出谷底，今場領軍作客傷兵滿營嘅雲達不來梅，目的只有一個—搶3分！1.43倍客勝要捧。
不來梅前鋒迪山度打柴

多蒙特早前有中場米希達利恩受傷，要唞6星期，馬高列奧斯同柏柏斯達夫普路斯亦繼續養傷，好在波蘭國腳巴拉斯塞高斯基已經好番，人腳算係冇咁緊張啦！「蜜蜂兵團」上半季最大問題係前鋒把握力，數據顯示佢哋每場平均射門15次，但入波百分比只得7%，話晒都係上季聯賽亞軍喎！好在意大利前鋒恩莫比尼上場對「二哥」禾夫斯堡踢出加盟以來嘅代表作，希望逐步好轉啦。

主場嘅雲達不來梅今季亦飽受傷兵問題困擾，阿根廷前鋒迪山度膝傷有排抖，波蘭中場奧拜尼亞克仍要養傷，最近更傳出荷蘭翼鋒艾利亞有意1月離隊，可能轉投打比郡跟恩師麥卡倫搵食。呢個傷出，嗰個嗌走，隊波士氣點會好？雲達不來梅今季主場只得2勝3和2負，今場因住畀「黃蜂」針到遍體鱗傷輸多場。
頂占筍盤：多蒙特（客勝）

有線球彩台主持阿占

電郵：soccer64@cabletv.com.hk

面書球彩專頁：http://fb.com/icable64

PHONE波熱線：1831 678

「超級星期六」：周六晚10:00至周日凌晨3:30