「東北打吡」黑貓唔赦喜鵲

猪拉多纳

英超聖誕快車特別多大戰，今晚早場先嚟一場超激嘅「東北打吡」，「喜鵲」紐卡素主場硬撼「黑貓」新特蘭，「喜鵲」繼續行衰運，球員傷完一個又一個，反觀「黑貓」攻力雖然曳，但至少仲有一定嘅防守力，今場作客可以頂到「喜鵲」，受讓值捧。

（now 621周日晚9時30分直播）
紐卡素3號龍恐再出醜

紐卡素傷病名單多達14人，包括正副門將告魯爾同洛艾利洛，第3守門員安尼克亦喺周中英聯盃8強整傷膊頭，好彩今場可以上陣。不過呢個21歲龍門上場英聯盃對熱刺出醜，失4球咁多，信心受損，今場「東北打吡」大戰味濃，安尼克好可能會因為太緊張又再出醜，實在難言穩勝。

上季分別幫新特蘭入咗8球同5球嘅阿當莊臣同域咸，今季表現大跌Watt，搞到「黑貓」依家攻力極之疲弱。不過「黑貓」今季只係輸咗4場咁大把，比熱刺、利物浦、愛華頓等名氣球會輸得仲少，連對住榜首嘅車路士都可以力保不敗，全因呢隊波防守力強，今季由曼城加盟嘅門將彭迪利蒙表現出色，「黑貓」今場有望再保不敗！