廠仔射爆紅軍

猪拉多纳

攻擊鐵三角機動又勤力

繼上星期「雙紅會」，今晚又有大戰，利物浦主場迎戰阿仙奴。上場聯賽「紅軍」慘吞曼聯3蛋，成隊波死氣沉沉，就算啱啱喺聯賽盃贏咗般尼茅夫終止3連敗頹勢，都一樣信唔過。今晚對住有辛迪卡索拉、韋碧克同阿歷斯山齊士合組鐵三角嘅「兵工廠」，睇怕利物浦就算有地利都冇運行，平手盤撐1.88倍嘅阿仙奴「客勝」！

麻煩友巴洛迪利早前喺社交網站上載咗一張經典卡通人物嘅相，標題有歧視之嫌，所以被足總罰款及停賽1場，今晚會「放假」做觀眾。今晚「紅軍」陣容同之前幾場一樣，史達寧會客串單箭頭孭飛，雖然佢上場聯賽盃梅開二度，協助球隊以3:1擊敗般尼茅夫晉級，但對手只係二打六，史達寧係咪真係適合打單箭頭，有睇「雙紅會」嘅球迷心中有數，今晚想搵阿仙奴着數？難啲囉！加上阿仙奴周中冇盃賽踢，體力點都比利物浦佔優。
利物浦史達寧踢箭頭唔掂

「兵工廠」最近表現反彈，先後喺歐聯同聯賽以4:1大勝加拉塔沙雷同紐卡素，全面復甦。阿歷斯山齊士同韋碧克踢法機動之餘，又夠晒勤力，活動範圍勁大，有助拉開對方防線。最重要係西班牙中場辛迪卡索拉一係唔入，一入就打孖嚟，對住「喜鵲」場波連省兩粒，連入球荒都破埋，信心肯定返晒嚟。論近況同人腳，阿仙奴都佔上風，平手盤坐走望贏。

（周一凌晨0:00now621直播）
盤路解碼

雙方近14次英超對決，阿仙奴取得5勝7和2負。
Data King：廠仔連開7口單

‧「兵工廠」英超連開7口「入球單」。

‧阿仙奴近17個英超入球，阿歷斯山齊士取得7球及4次助攻。

‧利物浦近7戰主場半場從未領先，僅得2次「半輸」及5次「半和」。
Data King：射手當弗「大」鬥法

利物浦射手史達寧上場英聯盃梅開二度，終於撻番着副偈，而阿歷斯山齊士同辛迪卡索拉近期狀態都弗到漏，今場對決隨時合演入球騷，1.75倍入球大要捧！